Mbunge ataka mawaziri watembelee majimbo

Mbunge wa Kavuu (CCM) Dk Pudensiana Kikwembe amewavaa mawaziri na manaibu waziri kwa kuomba mwongozo wa kazi na wajibu wa mawaziri.

Mara baada ya kipindi cha maswali na majibu bungeni Dk Kikwembe

aliomba mwongozo wa Spika kuhusu kazi na wajibu wa mawaziri.

Amesema  mara nyingi wabunge wakati wa kuuliza maswali ya nyongeza

wamekuwa wakiomba kuongozana na mawaziri kwenda majimboni mwao.

“Naomba mwongozo wako Mwenyekiti nipate kujua wajibu wa mawaziri

nikuombwa na wabunge kwenda majimboni ama ni wajibu wao kuzunguka

majimboni kujua masuala na matatizo ya wananchi?”amehoji.

Amesema  hata mbunge anapokuwa jimboni wamekuwa wakipita na misururu ya

magari huku wananchi wakiwaona badala ya kusimama na kujibu hoja na

kero za wananchi.

“Kwa mfano mheshimiwa Kalemani (Waziri wa Nishati Dk Medard Kalemani)

ametoka Inyonga akapita Kavuu usiku… Lakini wakumbuke (mawaziri) kuwa

wao ni wabunge na wanaenda kusikiliza kero za wananchi hawaendi

kumsikiliza mkuu wa mkoa wala DC (mkuu wa wilaya),”amesema .

Amesema wanaofanya hivyo ni mawaziri wengi tu lakini akawataja baadhi

yao mbali na Kalemani ni Waziri wa Maendeleo ya Mifugo na Uvuvi Luhaga

Mpina na Naibu Waziri wa Afya, Maendeleo ya Jamii, Jinsia, Watoto na

Wazee (hakumtaja jina) ambaye alikwenda kukagua ujenzi wa zahanati

baada ya kuitwa na Waziri Mkuu Mstaafu Mizengo Pinda.

Mwongozo huo pia uliombwa na Mbunge wa Tanga Mjini (CUF) Mussa Mbarouk

amesema kuwa wakati wa Bunge mawaziri wamekuwa wakiwaahidi kuwa

wataongozana na wabunge kwenda majimboni lakini wakiwapigia simu baada

ya bunge kumalizika hawapokei.

“Mimi nataka kila waziri kabla yua bunge kumalizika atoe orodha yake

ataongozana na mbunge yupi kwenda jimboni kwasababu sasa wamekuwa

wakitudanganya. Watayarishe orodha zao kati ya mbunge wa kwanza hadi wa

mwisho watakayekwenda naye jimboni,”amesema.

Akijibu miongozo hiyo Mwenyekiti wa Bunge Andrew Chenge amesema kanuni

hazikatazi waziri kuongozana na mbunge anapoombwa kufanya hivyo.

“Kutembelea maeneo mbalimbali ya nchi kuangalia utekelezaji wa ilani

ya CCM hilo ndilo jukumu wanapaswa wafanye hivyo sio baada ya

invitation (mialiko),”amesema.

Amesema kama waziri ametoa ahadi kwa mbunge bungeni kuwa ataongozana

naye kutembelea jimboni kwake si uungwana kutoonekana.

“Yale yanaoumizwa ni pale unapokwenda katika jimbo hata kwa kuitwa na

mtu mwingine na mbunge wa jimbo yuko bila hata kuwajulisha. Serikali

ikiweka utaratibu mzuri hakuna tatizo ili mbunge wa jimbo hilo

atambulike kwamba yeye ndiye yuko pale,”amesema.